President sawiselna chhuahtu journalist pawisa chawitir

Myanmar rama journalist pahnih chu an ram president, Thein Sein tihmingchhe zawnga thu an tihchhuah avangin kyat maktaduai khat (dollar 800) ve ve chawi tura hrem an ni.

Myanmar Herald chanchinbu chuan nikum khan eptu pawl, National League for Democracy member leh political analyst an kawmna an tichhuak a, hetah hian President Thein Sein-a'n inthlanpui neih tura chuh a tum leh tum loh a sawichian mai loh avanga a sawiselna thute a chuang tel a ni. An thu tihchhuah avang hian nikum November thla khan Infor­mation Ministry chuan thubuai a thehlut.

Sum chawi tura hremte hi chief editor hlui Kyaw Swa Win leh deputy chief editor Ant Khuang Min-te an ni a, dan siam thar Media Law palzutah puh a ni.

Chief editor Aung Kyaw Min chuan, "Judge te'n President Thein Sein chungchang sawina chu tihchhuah loh tawp tur tiin min hrilh a ni. President chu kan nu leh pa ang mai a ni tih sawiin, a sawiselna lam tihchhuah chu President tihhmingchhiat tumna a ni tiin a sawi a ni" a ti.