NKorea-in long-range rocket kah chhuahna tur a siam

North Korea chuan a missile base-a launch tower chu long-range rocket kahchhuah theihna turin a cheiṭha mek nia sawi a ni.

October 10 hian NKorea-a rorel lai, Workers' Party din champha kum 70-na an hmang dawn a, hemi pual hian long-range rocket hi kah­chhuah a tum nia sawi a ni. Tower a thuam ṭhat mek hi meter 67-a sang a ni.

United Nations Security Coun­cil chuan NKorea hi ballistic mis­sile technology a hman leh a enchhin a khap tlat a, mahse an khap­na hi NKorea hian vawi tam tak a bawhchhe tawh a ni.

South Korea lam chuan launch tower thuam ṭhat mek aṭang hian long-range missile, Unha-3 aia lian zawk kahchhuah an tum tiin a tarlang. Unha-3 hi kum 2012 khan NKorea hian a ram khawthlang lam tuipui kam aṭangin a lo kapchhuak tawh a ni.

Hetihlai hian NKorea ram chhunga ramdang mi palai awmte'n an ram hotu lu ber, Kim Jong-un sawiselna lam hawi kawl khapna dan siam thar a ni. Report chuan NKorea khawpui, Pyongyang-a foreign embassy leh international organisation awmte chu Kim Jong-un sawiselna leh deusawhna lamhawi thlalak, movie, lehkhabu leh file-te chu phone emaw com­pu­ter-ah kawl khap a ni.

NKorea sorkar khapna thupek siam thar hi UK chuan a sawisel a, mihring dikna chanvo palzutna a ni, a ti.