Boko Haram chetna bialte tan chhawmdawlna pe dawn

Nigeria helpawl, Boko Haram-te chet hluar­na, hmarchhak lam bialte tan World Bank chuan chhawmdawlna dollar tluklehdingawn 2.1 a pe dawn.

Nigeria President Mu­hammadu Buhari chuan World Bank offi­cial-te nena an inbiak hnuah, chhawmdawlna pek a nih tur thu hi a sawi.

President Buhari chuan sum an dawn turte chu helho pawikhawihna avanga infrastructure chhiate cheiṭhatna atan leh, buaina chhuak vanga tlanchhiate ṭan­puina atana hman a nih tur thu a sawi.

Buhari hian kum 2009 aṭanga khan Boko Haram-te hian Nigeria sorkar lakah helin pawikhawihna hrang hrang an thlen a, an pawi­khawihna avanga thi hi mi sang tel an tling tawh tih a sawi. Mi maktaduai khat chuang zet chu hmun him lamah an tlanchhe bawk. President hian helpawlte hi hneh ngei a tum thu a sawi.

Nigeria President chuan thuchhuah siam­in, World Bank hnen­ah chhawm­dawlna tur sum a pekte an hman dan enfiah tura team tir turin a ngen. Ṭanpuina sum hi loan anga pek a ni dawn a, kum 10 chhung chu a pung awm loa hmantir a ni ang.

President Buhari chuan an rama malaria leh polio hri leng khuah­khirh a nih theih dan tur chu World Health Orga­nization leh Bill and Melinda Gates Foun­da­tion aiawhte a sawipui bawk.