Turkey bomb puaka thite vui

Turkey ramri bula thih­chilh bomb puak vanga thite chu Thawhlehni tlai khan vui an ni.

Thawhṭannia Syria ramri bul, Soruc-a bomb puakah khan mi 32 an thi a, mi dang tam takin hliam an tuar bawk. Bomb puaka thi zinga a tam zawk hi university zirlai, Fede­ration of Socialist Youth Asso­ciation member-te an ni. Zirlaite hian Syria rama Kobane khuaa kal an tum a, Soruc-a Amara Cultural Centre-a news con­ference an buatsaih laiin an awmna hmunah hian bomb hi tihpuah a ni.

Bomb puaka thite ruang hi post mortem a nih hnuin, nimin khan Gaziantep khua­ah vuina inkhawm buatsaih a ni a, hemi hnu hian an khaw lam panpui an ni.

Pawikhawihna thleng hi eng pawl mahin an tih niin an chhal lo a, mahse Islamic State (IS) te tih nia ngaih a ni. Vuina inkhawma tel mi tam tak chuan IS firfiakte an duh lohna thu te, Prime Minister Recep Tayyip Erdogan-a kaih­hruai sorkar laka an lung­awi loh thute an aupui.

Turkey sorkar hi IS fir­fiakte bei na tawk loa puh a lo ni fo tawh a, mahse rorellai Justice and Development Party (AKP) chuan hei hi a dik lo tih sawin, sorkar chuan firfiak pawl tumah ngaih­nathiamna a nei lo a ni, a ti.