Iraq buaina vangin maktaduai 3 chuang an tlanchhe tawh
United Nations chuan Iraq tualchhung indona avanga tlanchhia chu mi maktaduai 3.1 an tling tawh tiin a sawi.
UN Deputy Spokesperson, Farhan Haq chuan Office for the Coordination of Humanitarian Affairs (OCHA) report-a a lan danin Anbar biala inbeihna thleng vangin April thla aṭang khan Ramadi district aṭangin tlanchhia 300,000 vel an awm tawh a ni, a ti.
Anbar bial hi Iraq khawthlang lama awm a ni a, he bial chhunga hmun tam zawk chu Islamic State (IS) firfiakte'n an la tawh a, Iraq security force-te chuan khawpui lian leh pawimawhte lak let tumin an bei mek a ni.
OCHA chuan nikum January thlaa IS leh Iraq security force-te inbeih ṭan aṭang khan mi tam tak an tlanchhia a, heng mite hian awmna tur mumal tak, chaw leh tui thianghlim te an mamawh tawh hle tiin a tarlang. Haq chuan, "Khaw lumin zual lam a pan zel avangin indona hlaua tlanchhiate hian ni sa laka invenna tur hmunte, tui thianghlimte an mamawh takzet a ni," a ti.
UN Assistance Mission for Iraq-in kar kaltaa report a tihchhuah chuan, kum 2014 January 1 aṭanga kumin April thla thleng khan Iraq ramah hian tualchhung indona thleng avangin civil mi 14,947 an thih bakah mi 29,189 chuangin hliam an tuar a ti.