Philippine President hlui Duterte man a ni

International Criminal Court (ICC) in Philippine president hlui Rodrigo Duterte chu, a kaihhruai sorkarin ruihhlo do beihpui a thlak laia mi tam tak tih hlum a nih kaihhnawiha manna thupek a tih chhuah bawhzuiin, nimin khan police-ten an man.

Philippine president Ferdinand Marcos office chuan thuchhuah siamin, Duterte hi nimina Hong Kong aṭanga Manila a thlen velah airport-ah police-ten lo manin, hren zui nghal a nih thu a tarlang.

ICC chuan kum 79 mi, Duterte hi kum 2011-a Davao khaw mayor a nih lai leh, a hnua Philippine President a nih lai, kum 2016 -2019 chhunga a kaihhruai sorkar chet dan a chhui a ni. Duterte President-na hnuaa ruihhlo do hna an kalpuinaah hian mi sang tel thah an ni tih rights group-te chuan an sawi a, heng an mi thah tam zawk hi mi rethei, ruihhlo zawrh leh tawlhnaa an inhnamhnawih ngei tih finfiahna awm lo te niin an sawi.

Duterte hian a President lai hian an rama pawikhawihna thlengte tih remna tur atan tiin ruihhlo do hna hi a thawk a, police-ten dik lo takin mi tam tak an thah phah nia sawi a nih laiin, a hmalakna hi Philippine mipui tam tak chuan an thlawp thung. Kumin May thlaa Davao mayor thlanna neih turah pawh chuh leh a tum thu a lo sawi tawh bawk.

Ruihhlo do beihpui thlaknaah hian mi sang tel tih hlum nia sawi ni mah se, ramchhunga thubuai ziah luh eawh a tam lo hle a, he thil thleng kaihhnawihah hian police pakua chauh thiam loh chantir an la ni bawk. Duterte hian thupek a tih chhuahah, police-te chu ruihhlo zuar leh tawlh ṭhinte an dapnaah an nunna derthawnga a awm nia an hriat chuan an mi rinhlelhte kah phalna a pe niin an sawi. Mahse Duterte chuan mahni invenna atan chauha tih a nih thu a sawi thung.

Nikum October thlaa Philippines Senate hmaa a inlan naah, Duterte chuan a thiltih avang hian ngaihdam dil emaw, chhuanlam siam emaw a tum lo tih a sawi. "Ka tih tur dik tak ka ti a ni. In awih emaw awih lo emaw, kha thil kha kan ram ṭhatna tura ti ka ni," a ti. Ruihhlo do beihpui thlaknaah hian mi 6,200 vel kah hlum nia sawi a ni.