North Korea-in ballistic missile a kap chhuak

North Korea chuan Thawhṭanni khan ballistic missile eng emaw zat a kap chhuak nia sawi a ni. Hemi ni vek hian South Korea leh US chuan annual joint military drill, Freedom Shield tih chu an nei ṭan bawk.

SKorea Chiefs of Staff chuan NKorea missile kah chhuah thu hi sawiin, Hwanghae province aṭangin West Sea-ah an kap tih a sawi. Korea ram pahnihte inkar hi a chhe zual hle a, nikum khan SKorea tih ṭhaihna atan NKorea hian UN-in a hrekna palzutin ṭum eng emaw zat ballistic missile a kap chhuak a ni.

NKorea chuan SKorea leh US-in joint military drill an neih chu sawiselin, he thil hi dan kalh leh an ram tih thinur tumna niin a puh a, vawi khat lek an ram an kap palh a nih pawhin indona chhuak mai thei a nih thu sawiin a vau. Kar liam ta kha NKorea hian US Navy aircraft carrier in South Korea-a Busan port a tlawh avangin a lo sawisel tawh bawk.

US-South Korea "Freedom Shield 2025" exercise hi March 20 thleng neih a ni dawn a; live, virtual leh field-based training te neih a ni ang. Freedom Shield hi ram pahnihten joint exercise an neih lian ber zinga mi a ni.