Russia-in Britain palai 2 a hnawt chhuak

Russia chuan Moscow-a Britain embassy-a palai pahnih chu enthlatua puhna kaihhnawihah Thawhṭanni khan an ram aṭanga chhuak turin a hriattir tih a sawi.

Russia Federal Security Service (FSB) chuan thuchhuah siamin, Britain palai pahnihte hian an rama luh phalna an dilnaah data dik lo an pe niin a sawi a, hei bakah Russia ram himna tiderthawng thei thilah an inhnamhnawih bawk niin a tarlang. An chungchang hi ngaihtuah a nih hnunah kar hnih chhung ngeia Russia chhuahsan turin a hriattir a ni. Britain lam chuan hemi chungchangah hian sawi a la nei lo.

FSB hian nikum khan British palai pasarihte chu enthlatuah a lo puh tawh bawk a, September thlaah paruk hnawt chhuakin November thlaah pakhat a hnawt chhuak bawk. Mahse heng mite a puhna hi UK chuan thu dik lo leh belhchian dawl lo niin a sawi thung.

UK hian kum 2024 May thla khan Russia defence lama thawktu, London-a awm chu a lo hnawh chhuak ve tawh bawk a, Britain-a Russia palaite hmunhma chu enthlak hna thawhna atan hman a nih thu a sawi. Hemi chhan letna atan hian Russia chuan a hnu lawkah an rama Britain defence hna thawktu chu a hnawtchhuak ve leh bawk.