Chad President hlui thubuai ngaihtuah

Chad President hlui, Hissene Habre chu paihthlak a nih aṭanga kum 25 hnuah a thuneihna chan laia mipuite laka pawikhawihna thlen leh midangte nghaisaa puhna thubuai a neihte ngaihtuah ṭan a ni.

Thawhṭanni khan Habre thubuai hi Senegal-a special court-ah ngaihtuah ṭan a ni a, courtroom-ah hian Habre hruailuh a nih lai hian pawn lamah a chhungte leh amah thlawptu mi tam tak pungkhawmin security officer-te nen an innawr buai a ni.

Kum 72 mi, Habre chuan an puhna chu thu dik lo a ni tiin, "Africa phatsantu, America chhiahhlawhte" thiltih a ni, a ti.

Kum 1982-1990 chhunga thuneihna a chan lai khan, Habre kaihhruai sorkar hi mipuite chungah a che rawng thei hle nia sawi a ni. Sorkar chet dan chhui chiang tura din, truth commission chuan kum 1992 khan report tichhuakin, Habre-a rorelna hnuaiah hian mi 40,000 chuang thah an ni a, mi 200,000 vel man niin, tan-inah rawng taka nghaisak an ni ṭhin tih a tarlang. Kum 1990-a President aṭanga paithlak a nih hnua Senegal rama a tlanchhiat khan an ram sum neihte pawh a tlanchhiatpui vek tiin an sawi bawk.