China-ah BRICS bank hawng

BRICS (Brazil, Russia, India, China leh South Africa) te'n multi-billion dollar development bank an siam chu China ramah hawn ṭan a ni.

New Development Bank (NDB) hi kumin July 8 khan Ufa, Russia-a BRICS summit neih­na­ah tlangzarh a ni a, he bank hi member ramte infrastructure pro­ject puihna tura ruahman a ni. Head­quarters chu China ramah dah a ni.

China Finance Minister Lou Jiwei, Shanghai Mayor Yang Xiong leh bank President KV Kamath-te chu Shanghai hotel-a bank hawnna inkhawma buat­saihah an tel a ni. Kum 67 mi, Kamath hi bank President hmasa ber niin, he hna hi kum nga chhung a chelh ang.

World Bank chuan NDB hawn a ni ta chu lawmawm a tih thu a sawi a, World Bank President Jim Yong Kim chuan, "New Development Bank President KV Kamath leh founding member Brazil, Russia, India, China leh South Africa-te lawmpuina kan hlan a ni. NDB leh institution dangte pawh ṭha taka thawhpui zel kan tum a, kan thiamna te inhrilh tawnin infrastructure project pui tur pawh hian thawhho zel kan duh a ni. Kan thil tum, kum 2030-a retheihna umbo tur leh intluktlan lohna tihbo kan tum te tihhlawhtling turin thawhhona ṭha tak kan neih a pawimawh dawn a ni," a ti.