Trump hian veteran-te ngaihdam dil rawh se: McCain

US Republican Sena­tor, John McCain chuan Republican party pre­sident candidate chuh tum zinga mi, Donald Trump-a'n war hero-te chung­chang deusawh taka a sawi chungchangah, war vete­ran-te lakah ngaihdam dil turin a phut.

Trump hian kar kal­ta Inrinnia Iowa-a thu a sawiah, Vietnam war veteran, John McCain-a mili­tary record chu a sawi lang a, war hero anga ngaih a nihna chu indo laia man a nih vang mai a ni, a ti. "Man tawk lo te kha kei chuan ka duh zawk" tiin a sawi.

Vietnam war lai khan McCain hi a thlawhtheihna kah thlak a nih hnuin man a ni a, kum nga chuang zet an hreng a ni. Hetihlai hian Trump hian military service hi zirlai a nih vang leh, hriselna lam ṭhat loh chhuan­lamin a zawm ve lo thung.

Thawhṭanni khan McCain chuan Trump chu a thusawi avanga ngaihdam dil tura a duh thu a sawi a, "Indonaa ram tana an nunna hlantu chhungte leh, ram chhanhimna tura an beih avanga tangte lakah chuan ngaihdam dil a ba a ni," a ti.

Trump thusawi hi Re­publican president candi­date chuh tum dangte pawh­in an sawisel a, can­di­date chuh tum zinga hma hruai mektu Jeb Bush chuan, "Midang sawichhe zawnga beih vak chu tihtawp a hun tawh e," tiin a twitter-ah a tarlang. Florida Senator Marco Rubio pawhin, "Hei hi thil atthlak tak a ni satliah a, huathlala leh ngeiawm tak a ni. He a thusawi hi commander-in-chief (Pre­sident) a tlin lohna tichiangtuah ka ngai," a ti. Rick Perry pawhin, "Kan ram harsatna tawh mekte sutkian dan tur ngaihtuah aiin, mahni chauh inngaih­tuah a, midangte ṭawng­kam chhe tak leh awmze nei loa beih chung­chang ngaihtuah zawktu kan hmu a ni," a ti.

Kum 2016-a US Pre­sident thlanna neih turah hian Republican candidate chuh tum mi 15 an awm tawh a, mipui ngaihdan lak ṭhenkhatah chuan Trump hi a hmahruaitu zingah a lo tel tawh a ni.