Pakistan rel hijack a ni

Jaffar Express chu Thawhlehni chawhnu lam khan Bolan huamchhunga tlangram Gudalar leh Piru Kunri bula tunnel-ah ralthuam kengte'n an lo dang a, Coach 9-ah hian mi 500 vel an chuang a ni. A hnuah Balochistan Liberation Army (BLA) chuan pawikhawihna thlengah hian mawhphurtu an nih thu an sawi.

Provincial khawpui Quetta aṭanga hmarchhak khawpui Peshawar pan tur rel ah hian pawikhawihna thlengin,passenger chhanchhuahte chu an khuaah haw tir an ni a, hliam tuarte chu Balochistan, Mach district-a damdawi-inah enkawl an ni. Mi dangte chu kilometer 100 vela hla Quetta-ah hruai an ni thung.

Balochistan chhunga Pakistan sipaite an beih theih loh hnuah BLA chuan an target chu sipai aṭangin civil mi ralthuam nei loah an sawn a ni. Hei hian mipui leh media-te ngaihvenna a pe nghal thei a, civil mipui zingah an support base tihchak loh chu an thil tum ber a ni, tiin Islamabad independent security analyst Syed Muhammad Ali chuan a sawi.

Firfiakte hian rel kawng an tihpuah bakah silaiin an kap a, driver chu a hliam tuar loin a thi a, rel chu leiverh chhungah tangin an thunun thei ta a ni.

Security force-te chuan mi mante chhuah zalen tumin beihpui an thlak nasa hle a, special force leh helicopter-te hman a ni. Passenger 155 chhanchhuah an ni tawh a, 37 in hliam an tuar bawk. Hetih lai hian firfiak 27 vel an thi tawh niin thu dawnna chuan a tarlang.

Pawikhawihna thlentu te hian suicide bomb an hak bakah an mi man ṭhenkhat te bula an ṭhut avangin chhanchhuah hna thawh a ti harsa hle a ni.