Kurdish kaihhruai SDF in Syria sorkar sipaite nen inzawmkhawm remti

Syria hmarchhak thununtu Kurdish kaihhruai militia alliance chuan Syria state-a sipai leh civil institution zawng zawngte inzawmkhawmna tur inremna an ziak tih an ram president chuan a sawi.

Inremna siamah hian indona tihtawp vek a ni, US thlawp Syrian Democratic Forces (SDF) chuan he biala ramri post, airport leh oil leh gas field pawimawh tak takte thuneihna an hlan dawn tih a tarlang.

Kurdish hnam tlem zawkte chu Syria state-ah an tel ve tih pawm ni bawkin, Syria mi zawng zawngte chu political process-a an tel theihna tur chanvo a pe bawk.

SDF commander, Mazloum Abdi chuan he inremna hi Syria thar dinna hun remchang tak a nih thu a sawi. Syria mipuite dikna chanvo tichiangtu leh remna leh zahawmna an duhthusam tihlawhtling thei tur hmalam hun ṭha zawk siam kan tum a ni, tiin Thawhṭanni khan Damascus-ah interim President Ahmed al-Sharaa nen inremna an ziah hnuah X-ah a post.

Nikum December thlaa Sunni Islamist pawlin president Bashar al-Assad a paihthlaa, kum 13 chhung tualchhung indona rapthlak tak a tihtawp hnuah Syria ram inṭhendarhte Shara-a'n zawmkhawm leh a tumna kawngah he inremna hi hmasawnna lian tak a ni.