Pakistan rel hijack-na thleng thunun a ni ta, helpawl 33 thah an ni

Pakistan rel Jaffar Express, khualzin mi 440 phur chu Baloch Liberation Army (BLA) ten Thawhlehni March 11-a an hijack chu, Nilaini zan khan sipaite beihpui thlakna hmanga thunun a ni. Passenger himdam eng emaw zat chhanchhuah niin, hijack-na thlengah leh chhanchhuahna hna thawhna ah hian sipai mi leh sa paliin nunna an chan bakah helpawl kut tuarin mi 21 in nunna an chan bawk.

Federal Minister for Information Attaullah Tarar chuan, Sipai ten chhanchhuahna beihpui an thlakah hian rel hijack-tu helpawl mi 33 chu thah chimih vek an nih thu a tarlang. Chhanchhuahna beihpui thlakah hian Pakistan Army, FC (Frontier Corps), SSG (Special Service Group) leh Air Force-te hmalakna hmanga chhanchhuah hna hlawhtling taka thawh a ni.

Lt. Gen. Sharif chuan thil thlen dan sawiin helpawl Jaffar Express hijack-tu te chuan an pawikhawihnaa bultumtu leh rilru seng tu ber Afghanistan-a awm chu rel hijack chhung zawng hian satellite phone hmangin an biak pawh reng thu a sawi a,"helpawl te chuan mihring an hren te chu inphen nan an hmang" tih sawiin hmalak a tih buaithlak thu a tarlang bawk.

Chhanchhuah hna thawktute hian, helpawl kut aṭang hian Nilaini tlai khan an mihren 100 bawrvel chu an chhanchhuah hman thu Shariff hian a sawi. Heng chhanchhuah hmasak zingah hian naupang leh hmeichhia eng emaw zat an tel niin a tarlang. Sipaite beihpui thlakna avang hian Nilaini chawhnu khan hijack-na thleng chu thununin mi hren la dam zawng zawngte chhanchhuah an nih thu an tarlang.