Mali-a Timbuktu mausoleum sa ṭha

Mali hmarlam, Tim­buktu-a mausoleum 14 chu Islamist firfiakte'n an tihchhiat hnuah sak ṭhat leh an ni. Timbuktu khaw­pui hi a pumin UNESCO chuan World Heritage Site-ah a lo telh tawh a ni.

Mausoleum-te hi kum thum liamta khan Islamist fir­fiakte'n an tihchhia a, tual­chhung mite'n a siamṭhat hna hi thawkin kum khat chuang zet an thawk a ni.

UNESCO hotu chuan Tim­buktu khua hi a tlawh tawh a, mausoleum tichhe­tute chu International Cri­minal Court-ah an chung­thu relsak tura a duh thu a sawi.

Timbuktu khawpui hi kum zabi 13-17 chhung Islamic learning center a ni ṭhin. School leh university 200 dawn awmin, khawvel ram hrang hranga Muslim zirlaite a hip khawm nasa thei hle a ni.

Mausoleum-te hi Tim­buktu khawpui dintute hriat­rengna atana siam a ni a, khawpuia chengte chuan heng hmunte hi hmun thianghlim angah an ngai hial a ni. Mahse kum 2012-a Mali hmarlam leh he khawpui luahtu, Islamist firfiakte chuan hei hi pawmloin, khawpui an luah chhung hian mosque leh mausoleum tam tak an tichhia a, hmanlai lehkha pawimawh dahṭhat pawh sang tel an halral sak a ni. Kum 2013, January thla khan khawpui luahtu, firfiakte hi France sipaite'n an umchhuak a ni.