Myanmar sipai hotuin inthlan result pawm dawn

Myanmar ram sipai hotu lu ber, General Min Aung Hlaing chuan November thla a an ram inthlanpui neih turah mipuite duhthlanna zahin, inthlan result chu pawm a tum thu a sawi.

BBC in a kawmnaah General Hlaing chuan he thu hi a sawi a, "Tu pawhin hnehna lo chang se, inthlan result hi kan pawm dawn a ni," tiin, president atana sawm a nih chuan a hnial dawn lo tiin a sawi bawk.

General Hlaing chuan, "Inthlanpui hi felfai leh dik taka kalpui a nih ngei ka ring. Chu chu kan duhthusam a ni bawk. Dik taka kalpui a nih theihna turin kan theih anga puih zel pawh kan inhuam a ni," a ti.

November 8-a inthlan­pui neih turah hian vote nei mi maktaduai 30 vel an awm a ni. Inthlan neih tur hi kum 25 chhunga eptu pawl Aung San Suu Kyi-i party, National Lea­gue for Democracy (NLD) in a chuh ve ṭum khatna tur a ni a, dik taka kalpui a nih chuan NLD hi a chet ṭhat hle rin a ni bawk.

Inthlanpui neihah hian NLD hian hnehna chang mah se, parliament seat 25% chu sipai tana hauhsak a la nih avangin sipai lam an la inrawlh thui thei hle rin a ni.

NLD chuan sorkar an siam thei a nih chuan an ram rorelnaa sipaite chanvo pekte chu tihtlem a tiam a, hei bakah hian an party hotu Suu Kyi-i president dinhmun chelh thei loa siamtu, ram danpui peng ṭhenkhat chu thlak danglam an tum bawk. Sipai sorkar laia danpui siam hnuaiah hian, ramdang mi laka fa neite chu an ram President-a dah theih an ni lo. Suu Kyi-i hian a pasal thi tawh, British mi lakah fapa pahnih a nei a ni.