Security meeting-a tel tura sawmna NKorea-in a hnar

North Korea chuan regional security conference nei tura South Korea sawmna chu a hnar a, hei hi South Korea chuan pawi a tih thu a sawi. Security conference hi September thla hian neih tum a ni.

SKorea Defence MInistry chun kar kalta Zirtawpni khan Seoul Defence Dialogue atan hian NKorea hi a sawm a ni. He inbiakna hi kum 2012 khan South Korea-in bul ṭanin, regional security chungchanga vice-ministerial-level inbiakna atana tih a ni. Kuminah hian he inbiakna hi September 9-a ṭanin, ni thum chhung neih tum a ni.

Mahse Pathianni khan NKorea-a Committee for the Peaceful Reunification of the Fatherland chuan inbiakna neih tum hi SKorea chuan politics lama hlawkpuina atana hman a tum tiin a sawi a, hei vang hian sawmna pawh hi a hnar rih tih a sawi. NKorea chuan inbiakna neih hmain, a kalpui dan turte duan lawk phawt a ngai a ni, a ti.