Pentagon hotu-in Israel a tlawh

US Defence Secretary Ash Carter chu Pathianni khan Israel-ah a zin a, nimin khan Israel Defence Minister Moshe Yaalon a kawm a, vawiinah Prime Minister Benjamin Netanyahu a hmu leh ang.

Ash Carter chuan a cham chhung hian Israel hruaitute nen ram pahnih sipaite'n inzawmna leh thawhdunna ṭha zawk siam dan an sawi dawn tih a, hemi rual hian Israel hruaitute hnenah Iran nuclear deal an dodalna titawp tura ngen kher a tum loh thu a sawi. Inremna an siam hi Israel leh US thawhpui Arab ramte himna atana a ṭhat thu hrilh hriat a tum zawk tih a sawi.

World power ram paruk leh Iran-te'n nuclear deal an siam tak chu Israel hian nasa takin a sawisel a, PM Netanyahu chuan he inremna hi Iran-in nuclear ralthuam a siam theihna tur hun remchang hawn sakna ni zawka a ngaih thu a sawi. Hei bakah hian Israel himna atan a hlauhthawnawm a ni, tiin a sawi bawk.

Carter hian Israel a tlawh hnuah, Saudi Arabia leh Jordan ramte a tlawh nghal dawn a, Iran nuclear deal chungchang a sawipui bakah, Islamic State (IS) firfiak pawl laka beihpui thlaknaa hmasawn dante a sawipui ang. US hian IS beitu, Syria helte chu Jordan-ah training a pe a, hei bakah hian Jordan air force chuan Syria rama IS lakah beihpui an thlak bawk a ni.