Myanmar ram inthlanpui Suu Kyi-in vote thlak lawk

Myanmar ram inthlanpui, November 8-a neih tur atan nimin khan Aung San Suu Kyi chuan an ram khawpui, Naypyitaw-ah vote a thlak lawk. 

Hri leng kara inthlanpui neih a nih dawn avangin kum 60 chunglamte chu vote an lo thlak lawk phalsak an ni. 

Covid-19 leng vangin Myanmar ramah hian khuahkhirhna  hman mek a ni a, kum 75 mi Suu Kyi-i pawh hi a vote neihna, Yangon khawpui bulah a kal theih loh avangin Naypyitaw-ah vote a thlak a ni. 

Eptu party-te chuan hri leng vangin inthlanpui neih tur hi sawn turin an ngen a, mahse rorellai National League for Democracy (NLD) party hotu Suu Kyi chuan ruahman lawk angin inthlan hi kaltlangpui a ni dawn tih a sawi. Hetih lai hian Rohingya Muslim mi nuai ruk vel awm chu khua leh tui nihna, citizenship hlihsak an nih avangin vote an thlak ve thei lo ang. 

Myanmar-ah hian Covid-19 kai hmuhchhuah hi 50,000 dawn an tling tawh a, mi 1,000 chuangin an thihpui tawh bawk. Hri lengin zual lam a pan avangin khuahkhirhna siam a ni a, mi tam tak hna thawk thei loin an awm mek a ni.