2020 US Presidential Election : Inthlan hautak ber tur
US President thar thlanna, November 3-a neih tur chu US President inthlan buatsaih tawha hautak ber tur nia sawi a ni a, inthlan hmasa aiin sum sen tur pawh hi a letin a pung dawn nia chhut a ni.
Research group, Centre for Responsive Politics chuan kumina US President thlannaa sum sen tur hi US dollar tluklehdingawn 14 vel a tling dawn niin a chhut.
Democratic presidential candidate, Joe Biden chu US Presidential candidate ni tawh zinga donor aṭanga USD tld khat tuak chhuak thei awmchhun a ni thei dawn a ni.
President ṭanglai, Republican candidate Donald Trump hneh ngei tumin Biden campaign committee chuan ṭan a la nasa hle a, October 14 thleng khan donor kaltlangin USD mtd 938 a hmu chhuak tawh. President Trump pawhin sum tuak chhuah lamah Biden hi tluk lo mah se a hmu ṭha tho a, USD mtd 596 a hmu tawh a ni.
Research group thuchhuah chuan, hripui leng karah mipuite chuan an candidate thlawpte tan donation an pe ṭha hle a, kum dang aiin donation pe hi tamin, record siam pawh an awm zel a ni, a ti. Donation an hmuh ṭhat avangin sum sen pawh a tam chho hle a, president inthlan ṭum hnih kal ta belhkhawma sum sen aiin kumin bika sum hman hi a tam zawk dawn niin a chhut.
Kumin donor zingah hmeichhia an pung hle a, Donor zinga maktaduai 1.5 vel chu hmeichhia niin, 44% an tling. Kum 2016 khan hmeichhia donor hi 37% chauh ani thung. Hmeichhe donor zinga a tam zawk hi Democratic donor an ni bawk.
Party pahnihte hian kumin angin small donor aṭanga sum tuak chhuah hi an la ngah ngai lo a, Democrats lam hian a la hmu tam zawk bawk a ni. Small donor tih hi USD 200 leh a hnuai lam chin thawhte an ni.
Vote thlak lawk an pung chak
November 3-a inthlan neih tur atan hian a duh tan vote lo thlak lawk phal a ni a, nimin thleng khan vote thlak lawk hi vote nei zinga hmun thuma ṭhena hmun khat, mi maktaduai 75 chuang an tling tawh.
Nilaini zan thleng khan registered voter zinga 36% in vote an thlak lawk tawh a, vote thlak lawk tam zualna hi Montana, Washington, Colorado leh Oregon state-te an ni. Montana-ah hian vote nei zinga 56% in vote an thlak tawh a, Washington-ah 53%, Colorado leh Oregon-ah vote thlak lawk 52% ve ve an awm tawh.