Taiwan in China chu ‘ramdang hmelma sipai’ tiin a sawi

Taiwan ram hruaitu Lai Ching-te chuan China nen politics leh economy-a an inzawmna chhe zel karah China chu ramdang hmelma sipai 'foreign hostile force' tiin a sawi.

Lai Ching chuan Taiwan chuan loh theih lohin hma a la dawn tih a sawi a, ram venhimna atana hmalakna thar tam tak a puang. Chung zingah chuan military court system siamṭhat leh China, Hong Kong leh Macau aṭanga lo kalte tan residency criteria khauh zawk siamte a tel. Hetih mek lai hian Lai thusawi chhangin China thuneitute chuan inzawmna tichhetu leh harsatna siamtu tiin an sawi ve bawk. China chuan Taiwan chu a ram angin sawi mahse, Taiwan chuan Chinese te nen an danglam niin an ngai thung.

President Lai chuan China chu Taiwan zalenna hmang ṭangkaiah puhin, khawtlang mi hrang hrang, armed force member awm mek leh awm tawhte, organized crime group leh media-te chu an ramchhung-ah ngei inṭhen darh tir bakah tihchhiat an tum thu a sawi bawk. Taiwan thuneitute chuan kum kal ta khan China spy mi 64 hrechhuakin, kum 2021 aiin a let thumin a pung a ni tiin Lai chuan a sawi a, an zinga a tam zawk chu sipai official emaw, sipai official hlui an nih thu a sawi.

China-in sipaite luhchilh leh enthlak a tumna dodalna atan Lai chuan sipai court system siamṭhat a tum thu a sawi a, sipai judge-te chu hmatawngah an kir leh theih nan active-duty military personnel-te nena inzawmna criminal case buaipui an tum thu a sawi bawk.