American Airlines thlawhna a kang; mi 12 damdawi inah hruai an ni

American Airlines thlawhna chu Ningani March 14 khan Denver International Airport-ah a ṭum hnuin, a khawl lam chian loh avangin a kang zui. Kangmei a chhuah vang hian mi 12 damdawiinah hruai an ni.

Damdawi ina phurh luh zawng zawngte hian hliam hlauhthawnawm an tawrh loh thu Denver International Airport social platform chuan X-a an thuchhuahah an tarlang a, passenger 172 leh crew member paruk te chu terminal-ah hruai an ni tih airline official-te chuan an sawi bawk.

Federal Aviation Administration (FAA) thuchhuah tarlan danin Colorado Springs Airport aṭanga Dallas Fort Worth pan tur Flight 1006 chu engine-ah vibration a awm vangin Denver Airport-ah hruai kawi a ni a, tlai dar 5:15 vel khan him taka a ṭum hnuah gate pana a tlan laiin Boeing 737-800 hi a engine a kang ta a ni.

Thlalak leh video-a a landanin thlawhna thlaah passenger-te an ding a, meikhu chuan thlawhna a hual bawk. FAA te chuan passenger te hi slide hmangin an chhanchhuak tih an sawi. American Airlines chuan thuchhuah siamin, thlawhna hian engine nena inzawmnaah thil fel tawk lo a awm tih a sawi. Thlawhtheihna hi a kan hun chiang taka hriat a la ni lo.