Iraq leh Syria-a Islamic state hruaitu thah a ni

Iraq leh Syria-a Islamic State (IS) group hruaitu senior pakhat chu US kaihhruai ṭangrual sipaite nen Iraq national intelligence service member-te'n beihpui an thlaknaah a thi tih Iraq prime minister chuan a sawi.

Prime Minister Mohammed Shia al-Sudani sawi danin, Abdallah Makki Muslih al-Rifai, Abu Khadijah tia hriat bawk chu Iraq leh khawvela firfiak hlauhawm ber pawla ngaih a ni, tiin a sawi. US president Donald Trump chuan "kan indonaa mi huaisen tak takte'n an that a ni" tiin a sawi ve bawk. Rifai hi IS operative dang pakhat bulah thia hmuh a ni a, firfiak pahnihte hian 'suicide vest' an ha a, ralthuam tam tak an nei bawk, tiin a tarlang bawk.

US Central Command (Centcom) chuan Ningani khan Iraq chhim lam Al Anbar province-ah precision airstrike an nei tih sawiin, IS member pawimawh ber zinga mi an thah thu hi an sawi.

Rifai hi IS-a thutlukna siam kawnga hotu lu a ni a, khawvel puma IS-in operation, logistic, leh planning a kalpui danah mawhphurtu a ni tih US Central Command chuan a sawi a, Group global organisation tana sum leh pai kaihruaitu a ni.

US president Donald Trump chuan a nun hrehawm tak chu ISIS member dang nen Iraq sorkar leh Kurdish Regional sorkar nena ṭangkawpin tihtawp a ni, tiin a sawi.

Gen Michael Erik Kurilla chuan Rifai chu khawvel pum huap IS pawl pumpuiah member pawimawh berte zinga mi a ni tiin a sawi a, kan ram leh US, leh a chhehvela an thawhpui leh personnel-te tibuaitu firfiakte an thah chhunzawm zel tur thu sawi a ni.

IS-te hi an hunlai chuan Syria hmar chhak aṭanga Iran chhimlam thlenga inzarpharhin ram 88,000 sq km-a zauah mi maktaduai 8 zette chu rawng takin an lo awp bet tawh thin a ni. Kum 2017 December thla khan Iran chuan IS-te hnehin, kum 2019-ah an inkhuarna hmun aṭanga hnawhchhuah fel a ni.

Amaherawchu, militant leh a ruka IS tan thawk ramchhung hmun hrang hrangah la awmte chuan a khat tawkin Iraq sipai leh police-te chu an la bei reng a ni.