Greece cabinet thar la lut

Greece Prime Minister Alexis Tsipras chuan an ram leiba laka chhanchhuah an nih theihna tura eurozone nena inremna an siam zawh hnuah a cabinet a siksawi a, cabinet thar hi kar kalta Inrinni khan lakluh an ni.

Leiba laka an harsatna sutkianna kawng khat atan, Greece chuan inremna an siam tawh bawhzuiin inrenchemna policy a kalpui a ngai dawn a, he policy hi Parliament pawhin a pass tawh a ni. Inremna hi ṭangrual sorkara tel, Radical left Syriza party chuan na takin a sawisel a, hei vang hian PM Tsipras chuan a cabinet member zinga helte, sorkar policy dodal zawnga vote-te chu a thlak a ni.

Kum 40 mi Prime Minister chuan Syriza member 39-in sorkar hmalakna an thlawp duh loh hnuah a cabinet hi a siksawi a, a ban zingah hian Energy Minister Panagiotis Lafzanis leh Deputy Minister pahnih an tel. Economic Ministry erawh a thlak danglam lo a, Finance Minister Euclid Tsakalotos leh Economy Minister George Stathakis-te chuan an hna an la chelh chhunzawm.