Europe-ah IS firfiakte inbun ngheh tum

Islamic State (IS) firfiak pawl chuan Europe-ah inbun ngheh tumin a rukin ṭan an la mek a, Europe laili, Bosnia rama thingtlang khaw pakhat bulah ram zau tak an lei tawh nia sawi a ni. He hmun hi khawthlang ramte laka beihna tura an hmunpui atan hman an tum tiin media report chuan a tarlang.

Tun hnaia Syria-a Osve khuaa training pek tawh, IS figther 12 chuan Syria ram hi an chhuahsan tawh a, mahse an zinga panga chu security force-te'n an kaphlum tawh nia sawi a ni.

Bosnia rama IS ram lei hi Medi­ter­ranean hnaih a nih avangin a remchang hle nia sawi a ni a, Syria, Iraq leh North Africa-a firfiak hrang hrangte pawhin an hmang tawh niin an sawi.

Security service chuan Bosnia-a an ram hi IS-te hian training camp atan an hmang tiin an sawi bawk.

Counter-terrorism expert, Dze­vad Galijasevic chuan, "He thing­tlang khua aṭang hian mi tam tak chu Syria ramah an kal tawh a, an kal belh zel bawk a ni. Firfiakte ram neih hi tlanga awm a ni a, a ruka kal theih a ni lo. He thil hi thil hlauhawm tak a ni," a ti.

Sunday Mirror chanchinbu chuan IS-te ram neihna hmun nia sawi hi GPS-ah a lang lo a, a pawhtu kawngte pawh a te a, car kal theihna tawk chauh niin a sawi.