Iran nuclear deal hi Israel tan a hlauhawm loh: US
World power ram paruk, P5+1 leh Iran-in nuclear deal an siam chu Israel chuan sawiselin, Iran tana nuclear ralthuam siamna remchang anga a ngaih thu a sawi.
Israel Prime Minister Benjamin Netanyahu bakah a minister hrang hrangte chuan Iran nuclear deal hi an sawisel a, khawthlang ramte chu Iran laka tlawm ta ang hialah an ngai a, inremna siam chu thiltihsual lian tak a ni, an ti. Iran nuclear deal hi a taka kalpuina turin US Congress pawmpuina lak a ngai ve leh dawn a, hetah hian an lo dan ngei a beisei thu Netanyahu chuan a sawi.
Mahse US chuan nuclear deal siam tak chu Israel tan a hlauhthawnawm dawn lo tih a sawi. US Under Secretary of State for Political Affairs Wendy Sherman chuan Iran inremna an siampui tak avang hian US tan middle east biala harsatna dang awmte chinfel puina tur kawng a hawnsak zawk dawn a ni, a ti.
US chuan Israel sipaite a puihna chu kum khatah dollar tluklehdingawn 1.5-a tihpun a tum. Media te chuan hei hi Iran nuclear deal vanga Israel lungawi lohna thawi dam a tumna nia an ngaih thu an tarlang.
Kar leh hian US Defence Secretary Ash Carter chuan Israel tlawhin, rawtna thar an neihte hi a sawipui ang. US-in Israel a puihna tihpun a tumah hian Israel chuan F-35 fighter jet tam zawk a neih theih phah dawn a, missile defence system lama research tihna tur sum pek a nih bakah, silai mu leina leina pawh pek belh a ni dawn a ni.
Tuna ram pahnihte'n inremna an neih mekah chuan Israel hian kum khatah US hnen aṭang hian dollar tluklehdingawn 3 a dawng a, heng te hi US siam, sipai hmanrua leina atan a tam zawk a hmang a ni. Israel leh US official-te chuan chhawmndawlna pek tihpun chungchang hi an sawiho mek a ni.
UN Security Council chuan Thawhṭanni khan Iran nuclear deal thlawpna resolution siam tumin vote a la dawn. Nilaini khan US chuan member ramte hnenah resolution hi a sem chhuak tawh a, Iran leh inremna a siampui ramte'n Iran nuclear program an hreksak dan tur chu member ramte an hrilhfiah bawk.