Greek bank-te hawng vek tawh dawn

Greece Deputy Fi­nance Minister Dimitris Mardas chuan karleh Thawhṭanni aṭangin Greece rama bank-te chu hawn vek an ni tawh dawn tih a sawi.

Greece sorkar chuan leiba a ngah vanga harsatna a tawh mekah, bank-te hi kar thum chhung kharin ATM aṭanga pawisa lak­chhuah theih zat pawh bithliah a ni. Mahse an ram leiba laka khaih­chhuahna tura eurozone nena inremna an siam theih tak avangin bank-te pawh hi hawn an ni leh thei dawn ta a ni.

Official-te chuan Thawhṭanni aṭangin bank hawngin, pawisa thawn vel pawh dan pangngaia kalpui leh theih a ni dawn tih an sawi. Ni khata mi pakhatin ATM aṭanga euro 60 chin chauh lakchhuah an phalsak erawh chu an la hmang zui dawn a ni. Mahse hei pawh hi thlahdul deuhin, lak loh ni an neih chuan a tukah a lak loh ni ai hi a lakbelh thei dawn a ni.

European Central Bank (ECB) chuan Greece leh eurozone-te'n inremna an siam theih mai loh avangin June 29 aṭang khan Greece banking sector tana Emergency Liqui­dity Assistance (ELA) a pek chu a titawp a, hei vang hian bank hrang hrangte hi khar an ngaih phah a ni.

Bank hrang hrangte khar an nih lai hian pensioner-te tan leh hna nei lo, ATM aṭanga sum lakchhuahna tur debit card nei lote tan branch 1,000 vel erawh chu hawn an ni thung.