MH17-a chuangte hriatrengna hun hmang

Australia chuan kum 2014, July 17-a Ukra­ine khawchhak lam­a kahthlak, Malaysia Air­lines thlawh­theihna, Flight MH17-a chuangte hriat­rengna hun a hmang.

Flight MH17 hi Am­sterdam aṭanga Kuala Lum­­pur pana a thlawh laiin kahthlak a ni a, thlawh­­theihnaa chuang mi 298-te chu an thi vek a ni. An zingah hian Australia mi 38 an tel.

Prime Minister Tony Abbott chuan Canberra-ah thlawhtheiha chuangte hriatrengna lung phun chu a hawng. Australia mi thi tate hming hi lung phekah ziah tlar a ni a, hei hi thlawhtheihna tlakna hmuna lei an lak chungah dah a ni. Hriatrengna hun an hmanah hian mitthi chhungte bakah mi tam tak an kalkhawm a ni.

PM Abbott chuan vanduaina tawka thite an hriatreng thu a sawi a, mitthi chhungte chu Australia mipuite chuan an tawrhpui tak zet a ni, a ti.

MH17 hi Ukraine laka inlakhran tum, Rus­sia thlawp helpawl leh Ukraine sipaite inbeih nasat laiin kahthlak a ni. Ukraine sipai leh helpawl te hian a kapthlatuah an inpuhtawn a ni. Ukraine leh khawthlang ramte chuan Russia thlawp helpawlte hian Russia-in a pek, BUK surface-to-air missile hmangin thlawhtheihna hi a kap thla niin an sawi a, mahse hei hi Russia chuan a pha a, Ukraine sipaite tih niin a sawi thung.

Thlawhtheihna kah thlak a nih dan hi Aus­tralia, Belgium, Nether­lands,Malaysia leh Ukraine dectective-te telna joint investigation team chuan a la chhui mek a ni.