Yemen Airstrike-ah mi 53 thi tawh

US-in Yemen Houthi helho thlawhna hmanga an beih hnuah mi 53 an thi tawh a, hmeichhia panga leh naupang pahnih telin, mi 100 velin hliam an tuar niin Houthi-te enkawl Health Ministry chuan a tarlang.

Airstrike-te hian Yemen khawpui, Sanaa chu bitumin, province dang pawh an kap a, Saudi Arabia ramri bula helho kulhpui, Saada pawh a tel a ni.

Houthi hruaitute chuan US-ina a beihna hi an chhanlet ngei tur thu an sawi. USS Harry S. Truman carrier strike group pawh missile leh drone hmangin an bei tih an sawi bawk. Mahse, U.S. chuan chutiang thil thleng engmah an hriat loh thu an sawi thung.

Hetih mek lai hian United Nations secretary general Antonio Guterres chuan thuchhuah siamin, insum theihna sang ber nen inbeihna zawng zawng titawp turin a ngen a, Arab-a hnam rethei ber Yemen-a mihringte dinhmun rapthlak tak a sawi lang bawk.

Inrinni khan Trump chuan Houthi-te lakah thutlukna siamin, America laka hel, piracy, leh tharum thawhnaa inhnamhnawihah a puh a ni. Trump chuan US chu Houthi-te lakah na taka an beihlet tur thu sawiin, Suez Canal, Red Sea leh Gulf of Aden kaltlanga lirthei tlan dan chu a inhnawh tawt a, hei hian sumdawnna nghawngin, Freedom of Navigation principle pawh a kalh a ni, a ti.

Houthi-te'n America lawng an bei chu an ngawihbopui loh tur thu sawiin, an tum an tihhlawhtlin hma chuan na taka an beih let tur thu a sawi bawk. Houthi-te hian Khawvela Waterway pawimawh ber pakhata lawng chawlhna chu an titawp a, Global Commerce hmun zau tak tak an tihtawp bakah, International Trade and Commerce-in a innghahna Freedom of Navigation principle bulpui chu an bei a ni, tiin Trump chuan a sawi.