US-ah tuialh thei Rs vbc 6,850 hu Reliance-in hralh

India billionaire Mukesh Ambani a company Reliance Industries Ltd chuan Rs vbc 6,850 hu tuialh thei chu kumkhat chhungin US-ah an hralh niin european think tank chuan an tarlang. Heng oil hralh chhuahte hi India-in Russia aṭanga crude oil an lei te aṭanga an siam a ni.

US chuan January 2024 aṭanga January 2025 thla tawp lam thleng khan oil thlit fimna hmun ruk lai India leh Turkey aṭangin Euro vaibelchhe 2.3 hu US hian an chaw lut a ni. Heng ram pahnihte oil thlitfim hi Russia aṭanga an lei ve ve anih thu Centre for Reseach on Energy and Clean Air (CREA) chuan an report-ah an tarlang.

Jamnagar, Gujarat aṭang hian US chuan petrol leh diesel Euro dollar vbc 2 hu an chaw lut a, heng oil chawk luhte hi Reliance company oil thlit fimna hmun aṭanga lei a ni. Hengte aṭanga Russian crude oil thlit fim leina atana hian Euro dollar mtd 724 lai sen ral nia chhut a ni bawk.

Turkey a oil thlitfimna pathum awm aṭang hian, Euro mtd 616 hu oil chu US hnenah an hralh chhuak ve bawk. Heng oil hralh chhuah zat aṭanga Euro Dollar mtd 545 hu chu Russia crude oil an lei aṭanga thlit fim an nih thu an tarlang a ni. Russian federal budget hmun thum a ṭhena hmunkhat hi, leilung hausakna laih chhuah te aṭanga hmuh chhuah niin an tarlang a, mah se Russia hian Ukraine an run hnuah ram dang eng emaw zat hnena oil an hralhte a tla hniam nasa hle thung.