Greece Parliament-in inrenchemna bill a pawm

Greece Parliament chuan an ram leiba laka chhanchhuak tura eurozone in a phut anga inrenchemna bill a siam chu a pawm ta.

Nilainia Parliament inkhawmah bill hi sawihoin vote lak nghal a ni a, member zingah 229 in a thlawp lama vote an thlak laiin a duh lo lamah vote 65 a tla a, mi paruk an hai thung. Bill hi pawm a nih tak avangin sorkarin sum lam inrenchemna turin chhiah lak dan leh pension system a siamṭhatte chu hman a ni ang.

Greece sorkar chuan leiba tam tak a neih avanga a harsatna sutkianna kawng khat atan sorkar sum hman tur a titlem dawn a, chhiah a tisang bawk ang. Bill hi Parliament-a ngaihtuah a nih hmain mi tam takin an dodal a, Nilaini zana ngaihtuah a nih lai pawhin parliament pawnah mi 12,000 vel pungkhawmin an duh lohna an lantir a ni.

Sawiseltute chuan inrenchemna kalpui a nih chuan retheihna a pung ang a, mi tam takin an hna an chan phah dawn bawk a ni, an ti.