Korea ram pahnih aiawhte an inbia
North Korea leh South Korea ram aiawhte chu NKorea ramri bula Kaesong khuaah inhmuin, Kaesong industry park-a hnathawkte hlawhbi chungchang an sawidun.
South Korea aiawh mi panga-te chuan ramri kanin Kaesong-ah hian NKorea aiawhte hmu turin an kal a, hei hi kum khat chuang hnuah ram pahnih aiawhte inbiakna hmasa ber a ni.
Korea ram pahnihte economic lama an thawhdunna, Kaesong industry park-ah hian South Korea company 120 awmin heng company hnuaiah hian North Korea mi hnathawka chhawr mi 53,000 vel an awm a ni. Mahse kum 2014 November khan NKorea chuan South lam rawn loin hnathawktute hlawhbi hi a tisang a, a thutlukna siam chu kumin February thla khan South lam a hriattir chuah a ni.
NKorea-in hnathawkte hlawhbi a siamṭhatah hian Koesong-a thawkte minimum wage chu US dollar 70.35 aṭangin dollar 74-ah a tisang a, hei hi a hmaa hlawhbi chungchanga ram pahnihte inremna aiin 5% zetin a sang a ni.