China-in Pakistan ṭanpui nan dollar mtd 10 a pe

China sorkar chuan Pakistan-a Federally Administered Tribal Area-a chengte chhawmdawlna turin US dollar maktaduai 10 a pe dawn.

Pakistan official-te chuan tribal biala cheng, sipaite beihpui thlakna avanga harsatna tawkte ṭanpuina turin sum hi an pe dawn tih an sawi. Special grant pekna tura inremna hi China Ambassador Sun Weidong leh Pakistan Economic Affairs division-a Secretary Muhammad Saleem Sethi te'n an ziak.

Chinese Embassy chuan thuchhuah siamin, "China chuan Pakistan-in a ram venhimna tura a beihna chu a thlawp a, hei vang hian Tribal Area din tharna tur leh mipuite chhawmdawlna kawnga a hnathawhnaah a pui chhunzawm zel dawn a ni," a ti.

Nikum June thla aṭanga Pakistan sipaite'n North Warizirtan biala Taliban firfiakte laka beihpui an thlak aṭang khan inbeihna tuartu, civil mi maktaduai khat zet chuan an in leh lo an tlanchhiatsan a ni. Pakistan thuneitute chuan North Waziristan biala 90% aṭangin firfiakte an umchhuak tawh tih sawiin, himna zawnga tlanchhia mipuite pawh an in lama an kir leh theihna turin hma a lakpui mek a ni.

China sorkar hian Pakistan-a security force leh firfiakte indona hlaua tlanchhiate puihna atan hian nikum khan dollar maktaduai 10 a lo pe tawh bawk.