Nazi officer hlui kum li tang turin hrem

Germany court chuan Nazi officer hlui, Oskar Groening chu kum li tang turin a hrem.

'The bookkeeper of Au­schwitz' tia hriat, Groening hi kum 94-a upa a ni tawh a, Ni­laini khan Lueneburg court chuan Indopui II hun laia Nazi-te'n an luahsak, Poland ram, Auschwitz camp-a mi 300,000 thah an nihnaa a inrawlh ve vangin thiam loh chantirin a hrem a ni.

Auschwitz camp-a tihlum tura Juda mi maktaduai khat chuang zet hruai an nih hian, Groening hian Juda mi an hruai thar apiangte bungrua endik a, an pawisa neihte lo la khawmin a lo chhiar a, a pawisa lakkhawmte chu Nazi headquarters, Berlin-ah a thawn ṭhin a ni. Heng pawisate hi Nazi-te hian indona senso atan an hmang zui ṭhin.

Groening hi a kum a upat tawh avangin jail-ah dah luh a ni kher dawn em tih sawichian a la ni lo a, court thutlukna hi a appeal thei bawk ang.

April thla aṭang khan Groe­ning-a thubuai hi ngaih­tuah ṭan a ni a, court-ah hruai a ni tirh pawhin an puhna te chu a hriatthiam pui thu sawiin, "Dan kalha thil tihnaa ka tel ve tih chu phat rual a ni lo. Hei vang hian a tuartute lakah inthiamlohna ka nei reng a, pawi ka tiin ka inchhir takzet a ni," a ti. Nazi tihduhdahna tuartute chunga ngaihdam dil tlak a nih loh thu leh Pathian ngaihdamna chauh chu a beisei chhun a ni, tiin a lo sawi tawh bawk.