Nuclear deal hi uluk taka zirchian a ngai: Khamenei

Iran ram hotu lu ber, Ayatollah Ali Khamenei chuan Iran leh world power ram paruk, P5+1 te'n nuclear deal an siam chu uluk taka zirchian a ngai a ni tiin, inremna an siampuite chuan an palzut lohna turin dan hmanga thiltih a ngai a ni, a ti.

Thawhlehni khan hun rei tak inbiakna an neih hnuin world power ram paruk leh Iran hian Iran nuclear program chungchangah inremna hi an siam a ni. Inremna an siam hnuaiah hian Iran-in nuclear program a kalpui chu hun rei tak chhung titawp a remti a, hemi chhan letna atan hian US, European Union leh United Nations-in Iran an lo hrekna te chu an hlip thung ang.

Iran chuan nuclear prog­ram a kalpui hi a muan­awm zawngin, ener­gy siamna atana ti a nih thu a sawi a, mahse khawthlang ram leh Israel chuan nuclear bomb siamna atana ti niin an ringhlel a ni.

Inremna thuthlung an ziahfel hma hian Supreme Leader Khameinei chuan Iran President Hassan Rouhani hnenah lehkha thawnin, "Inremna chu hmasawnna pawimawh tak a ni a, mahse inremna tur thuthlung duante chu ngun tak zir chian a, lehlam pawlte'n an palzut theih lohna tura dan hmanga hmalak theih dan turte ngaihtuah tel a ngai a ni," tiin a hrilh. Inremna an siampui, P5+1 member ṭhenkhat chu rin ngam an nih loh thu a sawi bawk.

Israel chuan Iran nu­clear deal hi nasa takin a sawisel nghal a, khaw­thlang ramte'n Iran hrekna an hlih chuan nuclear ralthuam siamna tur hman­ruate a la lut thei tawh dawn a ni, a ti. Israel Prime Minister Benjamin Neta­nyahu chuan Iran nuclear deal chu Iran hnena mi that tura phalna pek anga a ngaih thu a sawi bawk.

Hetihlai hian US President Barack Obama chuan inremna an siam thei chu lawmawm a tih thu sawiin, he inremna hi khawvel ram 99% bakah nuclear expert tam zawkin ṭha an ti a ni, a ti. Obama thusawi hi inremna siam duh lo lamin an helh nghal hle. Mahse Obama chuan sawiseltute chu rawtna ṭha zawk an neih chuan sawi turin a cho let thung.