Instanbul mayor man a ni

Turkey police-te chuan eirukna leh firfiak nena inzawmna nei nia sawi Istanbul mayor Ekrem Imamoglu chu an chui chianna kalzelah Nilaini March 18 khan an man. Imamoglu hi President Recep Tayyip Erdogan-a khingpui ber a ni.

State enkawl Anadolu Agency chuan prosecutor-te hian mi dang 100 vel tan warrant an tichhuak tih sawiin, thuneitute chuan Istanbul chhehvela kawngpui eng emaw zat an khar a, khawpui chhungah ni li chhung nawrh huaihawt an khap bawk a ni.

Ekrem Imamoglu chu University pakhatin a diploma chu a lem anih thu a puansak hnuah, a chenna in dap niin man zui nghal a ni.Turkey dan hnuaia inthlanpui neih turah hian University degree neih a ngaih avangin, eptu pawl candidate tura rinkai ber Imamoglu chuan president a chuh thei dawn ta lo a ni.

Sorkar lai Republican People’s Party khingpui ber Mayor party chuan Pathianni hian inhmuh khawmna an nei dawn a, hetah hian Imamoglu hi president thlanna neih turah candidate atan thlan a nih beisei a ni. President thlanna hi 2028-a neih tur ni mah se, hemi hma hian inthlanna neih a rinawm mah zawk a ni.

Imamoglu diploma hnawl sak a nih chungchangah thuchhuah siamin Istanbul University chuan, kum 1990-a Cyprus hmar lama private university aṭanga Faculty of Business Administration-a a transfer-naah thil dik lo a awm tih an sawi. Imamoglu chuan University thutlukna siam chu a khing let dawn tih a sawi ve bawk.

Imamoglu hian thubuai tam tak a nei a, heng thubuai vang hian lung in a tantir theih a nih bakah, politics a inhnamhmawih khapsak theih a ni. Hei bakah hian, Imamoglu chu kum 2022-a Türkiye Supreme Electoral Council member-te sawichhiatna avanga thiam loh chantir a nihna a appeal mek vangin politics -a tel khapsak theih a ni bawk.

Kum 2019 March thla khan kum zabi kua chhung Istanbul thunun tawh Erdogan leh President’s Justice and Development Party hnehin Imamoglu chu Mayor atan thlan tlin a ni.