Russia-Ukraine inkahhai puanna Saudi Arabia-ah sawi ho dawn

Hun eng emaw chen chhung ram pahnihte indona thlengah, Pathianni March 23, khian Saudi Arabia, Jeddah hmunah inkahhai puanna tur chungchang sawiho anih tur thu president Trump-a envoy Steve Witkoff chuan Thawhlehni khan a sawi.

Witkoff chuan Saudi Arabia-a US aiawh tur te chu Secretary of State Marco Rubio leh National security advisor Mike Waltz ten an ho dawn niin a sawi. Mahse, inbiakna an neih pui turte erawh a tarlang tello thung, Witkoff chuan energy infrastructure beihna leh Black Sea beihnaa inkahhai puanna tur hi Russian lam chuan an pawm tawh thu sawiin Ukraine lam pawhin an pawm a beisei thu a tarlang bawk.

US lam chuan ram pahnih inkar indona ah hian ni 30 chhung inkahhai puan chu hmalakna pawimawh hmasa a nih thu leh kum thum chhung indona thleng tawha hmalakna zau zawk a awm theih na atana pawimawh hmasa a nih thu an sawi ve bawk a ni. Russia lam chuan Putin-an a sipai te chu Ukraine energy hmunpui ni 30 chhung kaplo turin thupek a chhuah thu an tarlang a ni.

Ukraine lam chuan, nimin Nilaini khan Russia in US hmalaknaa inkahhai puan tumna chu a dodal reng niin an sawi thung. Hei hi Russia-in energy grid kap lo tura an inrem hnu lawkah, vantlang mipui awmna an beih zui leh nghal vang a nih thu an sawi.