Israel-in Gaza-ah beihpui thlak chhunzawm

Israel Defence Forces (IDF) chuan nimin khan Gaza Strip hmun laili leh chhim lama Hamas hmun pawimawhah beihpui thlakin he hmun kalpawhna pawimawh, Netzarim corridor chu an thununna hnuaiah a awm leh tawh tih an sawi.

IDF hian a hmain thlawhtheihna hmangin Gaza Strip-ah hian beihpui an lo thlak tawh bawk a, mi 400 chuang an thi nia sawi a ni.

Social media-ah Gaza Strip-ah beihpui an thlak leh thu hi tarlangin, IDF chuan security zone tih zauhna atan leh, Gaza hmar leh chhim lam inkalpawhna siam tur khawmual lama beihpui thlak leh an nih thu an sawi. IDF-a 252nd Division chuan Gaza hmar leh chhim inkara kawngpui pawimawh chu a chanve vel an thunun tawh tih an sawi. IDF chuan Israel mite venghim turin Gaza-a firfiakte chu an bei chhunzawm zel dawn tih an tarlang.

Israel defence minister Israel Katz chuan Gaza mipuite tan 'last warning' ti chhuakin, US president Donald Trump-a'n Gaza Strip aṭanga Hamas te chhuah tir vek tura thurawn a pek chu pawm turin a ti. "United States President thurawn kha zawm rawh u. In mi hrente chhuah tir vek ula, Hamas chu ti bo rawh u. Hei lo chu thlan tur dang pakhat a awm - he hmun hi chhuahsan a ram danga insawn a ni," a ti.

Israel leh Hamas hian Gaza Strip-ah inkahhai thawh khatna, ni 42 awh an hmang zo tawh a; a thawh hnihna chhunzawm turin inremna an siam thei rih lo a ni. Inremna an siam chhunzawm theih loh avangin Israel pawhin beihpui a thlak chhunzawm leh nghal a, ram hrang hrangte dem pawh a tawk hle. Mahse Israel chuan ram dangte demna hian thil nihna dik tak a ti danglam chuang lo tih sawiin,Gaza Strip-ah firfiak pawl an la awm reng a, mi eng emaw zat an la hreng reng a ni, a ti. Hamas chuan Israel mi chauh ni lo, Palestinian mipui zawng zawng an tawrh tir tih an sawi. Indona tuartu, Gaza-a civil mite tana chhawmdawlna thawnluhte chu Hamas hian lo thununin, a thlawna sem tura tih chu Palestinian mite hnenah ngei an lei tir tih an sawi.