Israel PM-in Shin Bet hotu a bân

Israel prime minister Benjamin Netanyahu chuan an ram intelligence agency, Shin Bet hotu Ronen Bar chu October 7, 2023-a Hamas in Israel an beihna thleng kaihhnawihah a hnaah hlawhchhamah puhin a ban.

PM Netanyahu-a'n Hamas-te pawikhawihna thlen hnuah Ronen Bar hi a ring zo tawh lo tih sawi in, a hna aṭanga ban tura rawtna a siam chu Israel cabinet chuan Ningani khan pawmin, nimin khan Bar hi ban a ni ta a ni. A thlaktu tur hi April 10 hma ngeia ruat fel tum a ni

Bar hi sorkar hmasa khan kum 2021 October-ah Shin Bet hotu atan ruat a ni a, kum khat term a la nei. Hamas te beihna an tawh hma pawh khan PM Netanyahu nena an inkar hi a ṭha lutuk lo nia sawi a lo ni tawh.Kumin March 4-a Hamas te pawikhawihna thlen chungchanga Shin Bet report tih chhuah a nih hnuah an boruak a ṭha lo zual a ni. Bar hian Hamas beihna an lo dan loh avangin mawhphurhna lain, a term tawp hmaa ban a tum thu pawh a lo sawi thawi tawh bawk.

Hetih lai hian eptu party-te chuan Bar ban a ni chu na taka sawiselin lungawi lohna an lantir a, PM chu an ram democracy dinhmun ti derthawngah an puh. Ningani zana Bar chungchang ngaihtuaha cabinet meeting neih laiin eptute hi meeting an neihna, Parliament kawtah leh Netanyahu chenna in kawtah an pungkhawm a ni.

Israel hian Gaza Strip-a Hamas nena inkahhai an puan thawh khatna a zawh hnuah, Thawhlehni aṭang khan Hamas hmunte beiin beihpui a thlak chhunzawm leh tawh a ni. PM Netanyahu chuan beihpui an thlak chu Hamas mi hren mek, mi 58 la awmte chhuah an nih theihna tura an nawrna a nih thu a sawi.