SKorea acting President-ah Han Duck-soo dah let

South Korea Constitutional Court chuan nimin khan acting president atana lo dah tawh, ban a nih leh nih loh tur ngaihtuah tura tih vanga chawlh tir, prime minister Han Duck-soo chawlh tirna chu hnawlin, acting president-ah a dah let leh. Hetihlai hian president Yoon Suk Yeol chungchangah erawh thutlukna a a la siam lo.

Yoon hi nikum December thlaa an rama sipai thuneihna sanga pekna tur, martial law a puan avangin Parliament-ah President a nihna aṭanga ban a nih leh nih loh chungchang ngaihtuah tura pawm a ni a, Constitutional Court hian thutlukna a siam dawn a ni. Hei vang hian President a nihna aṭangin chawlh tir a ni a, a thlaktu atana ruat PM Han pawh hi a chungthu ngaihtuah tura tih a ni leh bawk. Court in chawlh tir a nihna a tih tawp hi Han hian martial law puan chungchangah mawhphurhna lian tham a nei ve lo a, ban tirna khawp a tling lo niin justice pariat zinga pasarih chuan an ti. Justice pakhat erawh chuan ban tir hi a thlawp thung.

Court thutlukna puan leh, acting president atana dah let a nih hnua thu a sawiah, Han chuan an rama tana thil pawimawh hmasate chu a buaipui nghal dawn tih sawiin, heng zingah hian ram dangte nena insumdawn tawnna chungchang pawh a tel. Ram mipuite chu inpumkhat ṭha tura sawmin, mi tin tana pawimawh ber chu an ramin hma a sawn chu a ni, a ti.

Yoon hi martial law a puan kaihhnawihah hela puhna thubuai siamsak a ni bawk. He thubuaiah hian thiam loh chantir a nih chuan thi tura hremna emaw, dam chhung tan tir emaw pek a ni ang. March 8 khan jail aṭangin chhuah tir a ni a, mahse khuahkhirh zui a ni.