Israel-in Gaza chhim lama hospital lian ber an bei - Hamas

Gaza Strip-a Hamas Health Ministry chuan Israel sipaiten Pathianni zan khan Gaza Strip chhim lama hospital lian ber an bei niin an sawi. Hospital beih a nih vang hian mi pahnih an thi a, hliam eng emaw zat awmin kangmei a chhuak bawk niin an tarlang.

Gaza Health Ministry chuan Israel sipaite hian Khan Younis-a Nasser Hospital-a surgical building an kap a, thi pahnih zinga pakhat hi ni hnih liam taa zai tawk kha a nih thu an sawi. Thi dang pakhat Hamas political bureau member, damdawi-ina enkawl lai mek a ni, an ti.

Israel sipai pawhin hospital an kah thu hi an sawi chiang tawh a, mahse he hmun hi Hamas lamin an hman vanga bei an nih thu an sawi. Inbeihnaa civil mite thihna thleng ṭhin chungchangah Hamas chu mawhphurtuah puhin, civil mite bitna hmuna an chet tlat ṭhin vang a nih thu an sawi a ni.

Gaza Strip-a inkahhai thawh khatna hman zawh a nih hnuah, a thawh hnihna hman chhunzawm tura Israel leh Hamas ten inremna an siam theih rih loh avangin kar liam ta Thawhlehni aṭang khan Israel chuan beihpui a thlak chhunzawm leh ṭan a ni. Israel sipaite chuan Gaza chhim lama Rafah khaw chhim lama cheng Palestinian mite chu hmun danga insaseng turin an hriattir. Heng mite hian Muwawi-a tent camp lam an pan a ni.

Gaza Health Ministry chuan October 7, 2023-a Hamas ten Israel an beih avanga Gaza Strip-a Israel beihpui thlaknaah Palestinian 50,021 an thi tawh niin a sawi. Kar liam ta Thawhlehni aṭanga Israel-in beihpui an thlak thar leh hnuah mi 673 an thi tawh bawk niin a tarlang.