Damdawi-in aṭangin Pope Francis a chhuak

Roman Catholic kohhran hruaitu, Pope Francis chu kar nga chhung Rome khawpuia Gemelli hospital-ah enkawl a nih hnuin, Pathianni khan damdaw-in aṭangin a chhuak thei ta.

Damdawi-in aṭanga chhuah a nih hma hian Pope hi a awmna room bathlarah mipui hmuhah a rawn inlan a, damdawi-in bula a chanchin ngaihvena pungkhawmte mal a rawn sawm a ni. February 14-a damdawi-ina dah luh a nih hnua mipui hmuha a inlanna hmasa ber a ni. Kum 88 mi, Pope hi thla hnih vel tal Vatican-ah a chawlh hahdam a ngai dawn tih a doctor-te chuan an sawi.

Pope hi damdawi-ina a awm chhung hian dinhmun ṭha lo tak leh, a kal mai dawn emaw tih hmanin a awm hman. Mahse tunah chuan pneumonia pawh a nei tawh lo a, hetianga a ṭhat chhoh zel chuan hna pawh a thawk leh thei thuai dawn niin an tarlang.