Israel-Hamas war : Egypt-in inkahhai puanna tur rawtna thar siam

Gaza Strip-a inkahhai thawh hnihna kalpui a nih theihna turin Egypt chuan rawtna a siam thar leh a, hei hi Hamas lam chuan an ngaihtuah mek niin an sawi. Mahse Israel chuan Egypt rawtna siam hi an la dawng ve lo niin a sawi thung.

Egypt rawtna siamah hian Hamas chu an mi hren mek zinga pangate chhuah tura tih a ni a, an zingah hian American-Israeli Edan Alexander pawh a tel. Israel lamin Gaza Strip-ah chhawmdawlna thawn luh phalsak leh Palestinian mi tang eng emaw zat chhuah tura tih niin, hei bakah kar khat chhung indo chawlhsan turin a ti bawk a ni. US pawhin Egypt rawtna siam hi a thlawp nia sawi a ni bawk.

Israel leh Hamas hian Gaza Strip-ah inkahhai thawh khatna chu ṭha takin an lo kalpui tawh a, hemi chhung hian mi tang eng emaw zat an in chhuah sak tawn hman a ni. A thawh hnihna kalpui chhunzawm tura ruahman ni mah se an inrem thei ta lo a ni. Inkahhai puan chhunzawm a nih theihna atan hian Qatar, Egypt leh US chuan hma an la mek a ni.

UN-in Gaza-ah staff titlem dawn

United Nations chuan Israel-in Gaza Strip-a Israel-in kar liam taa beihpui a thlak thar lehnaah an compound pakhat fuh in, an staff pakhat a thih hnuah Gaza-a an staff awm zat tih tlem an tum tih an sawi.

UN Secretary-General thupuangtu, Stéphane Dujarric chuan Gaza-a international staff an dah 100 zinga hmun thuma ṭhena hmun khat chu lak chhuah an tum tih a tarlang. Mahse UN hian Gaza-ah hian national staff 13,000 vel a la nei tho a, heng mite hi UN agency for Palestinian refugee, UNRWA tana thawk an ni.

Dujarric chuan Israel-in beihpui a thlak thar leh chu an tan a him lo hle nia sawiin, kar thum chhung chu Israel hian Gaza-a ei tur, damdawi leh chhawmdawlna lut tur a dan sak tawh niin a sawi bawk. March 19 khan Israel tank chuan central Gaza-a UN guesthouse a kap fuh niin a sawi a, mahse Israel sipaite chuan he thil thlengah hian a mawhphurtu an ni lo tih an sawi thung.

UN humanitarian office, OCHA thupuangtu Olga Cherevko chuan UN leh a thawhpui dangte chuan Gaza Strip-a an hmalakna ṭhenkhat chu an ti tawp tawh tih sawiin, heng zingah hian education, water leh sanitation service lam pawh a tel. Inbeihna thleng chhunzawm reng avangin an hna thawh ṭhin tam tak an thawk thei lo tih sawiin, thawktute tan pawh a him tawk loh avangin an thawhpui ṭhinte pawhin an hna thawhte an chawlhsan tih a sawi.