Myanmar sipaiten medical clinic an beihnaah mi 11 an thi

Myanmar sipaite chuan kar liam ta Inrinni khan thlawhtheihna hmangin an ram khawthlang lam, Magway biala Hnan Khar khuaah beihpui an thlak. Beihpui thlaknaah hian medical clinic kap fuhin, mi 11 an thi. Thi zingah hian clinic neitu doctor leh a nupui pawh an tel.

Hnan Khar khua hi sipai sorkar dodaltu pawl kuta awm a ni. Tualchhung mite chuan Inrinni zing lamah sipai thlawhhtheihna hi an khaw chungah hniam takah rawn thlawkin, bomb a thlak niin an sawi. Tun hnaiah sipaite hian beihpui an rawn thlak fo niin an sawi bawk.

Non-profit organisation, Armed Conflict Location and Event Data (ACLED) chuan Myanmar sipaiten kum 2021-a civil sorkar thuneihna an hnehchhuh hnuah civil mite beihna hi kum tin a thleng tam zel niin a tarlang. Kum 2024 khan civil mite beihna hi ṭum 800 dawn a thleng a ni.