Dik lo taka tih hlum tura hremna pek hnenah zangnadawmna USD mtd 1.4 pe

Japan mi, Iwao Hakamata chu dik lo takin tualthah thubuaia thiam loh chantira tih hlum tura hremna pek a nih hnuah, tih hlum hun nghaka kum 40 zet jail-a dah a nih avangin zangnadawmna USD mtd 1.4 pek a ni.

Hakamata hi kum 89 mi a ni tawh a, boxer hlui niin kum 1966-a mi pali thahna thubuaiah thiam loh chantir a ni. Tih hlum tura tih niin, hemi hun nghak hian jail-ah kum 40 chuang a tang a ni. Mahse a farnu leh midangten theihtawpa an beih hnuah, a thubuai hi ngaihtuah nawn leh niin nikum September thla khan Shizouka District Court chuan thiam a chan tir a ni. Court chuan tualthahna thleng finfiahna awmte chu police lamin an ti chhia niin a sawi.

Thawhṭanni khan court chuan Hakamata hi a thiam loh ni loa kum 40 chuang jail tantir a nih avangin zangnadawmna, yen 217,362,500 (USD mtd 1.4) pek a nih tur thu hi a puang. Hetih lai hian Hakamada legal team chuan a thil tawrhte ngaihtuahin zangnadawmna pek hi a la tlem niin an sawi. Hakamada hi thiam chan tir a nih hnuah a farnu bulah a khawsa a ni.

Japan hi industrialised democracy lian zingah US bakah capital punishment la hmanna ram a ni a, he policy hi ram mipuite pawhin an thlawp viau a ni. Justice minister chuan nikum October thla khan thi tura hremna dan tih bo chu thil ṭha tak a nih loh thu a lo sawi tawh. Hakamada hi thi tura chungthu an relsak tawh, thubuai ngaihtuah nawn leh pangana niin, mi dang palite pawh hi an thubuai ngaihtuah ṭhat leh hnuah chhuah leh vek an ni bawk.