China-ah Bangladesh Chief Adviser a zin

Bangladesh ram hruaitu lailawk, chief adviser Muhammad Yunus chu ni li cham turi Nilaini khan China-ah a zin. A cham chhung hian China ram hruaitu hrang hrangte kawmin, president Xi Jinping nen pawh an in hmu dawn a ni.

Muhammad Yunus hi Nilaini khan Hainan-a Boao Forum for Asia Annual Conference-ah a tel a nghal a, Ningani khan Beijing panin China vice foreign minister Sun Weidong-a'n a lo hmuak a ni.

Hainan-a conference neih kar lakah Yunus hian China vice premier Ding Xuexiang nen inkawmin, Bangladesh-a hmasawnna hna thawhna hrang hranah China puihna a dil a ni. Hei bakah China in loan a pek punna chu 3% aṭanga 1-2% a ti hniam turin a ngen a, Bangladesh-a Chinese-funded project-ah commitment fee pawh ngaidam turin a ngen bawk.

Yunus hian Russia deputy prime minister Alexey Overchuk pawh hmuin, Russia ram hruaitu hian Bangladesh rama wheat leh fertilizer thawn luh an duh thu pawh a lo hrilh a ni. Hruaitu pahnihte hian Bangladesh-a Russia bultuma Roopur Nuclear Power Plant hman dan tur chungchangte pawh an sawi dun a ni.

Boao Forum chairman, UN secretary-general hlui Ban Ki-moon leh Yunun pawh in hmuin, Bangladesh-a democracy rorelna kenkawh nih theihna tura hma lak dan turte an sawi. Yunus chuan,"Bul ṭan thar kan duh a, in mi puihna leh thurawn kan mamawh a ni," tiin a hrilh.