Thailand-in in chim chungchang chhui chiang dawn

Thailand sorkar chuan lirnghing vanga an ram khawpui, Bangkok-a in chhawng sang tak sak lai chim chungchang chu a chhuichiang dawn.

Deputy prime minister Anutin Charnvirakul chuan Inrinni khan in chimnna hmun hi a tlawh a, he in sak danah thil dik tawk lo a awm em tih chhui chiang turin thupek a ti chhuak nghal. Lirnghing vanga in chim ta hi joint venture hmanga thawh niin, an zingah hian China firm pawh a tel. Civil engineer leh Democrat Party politician, Prof Suchatchavee Suwansawas chuan hetianga rang taka a tluksawp ringawt danah in sak danah hian thil dik lo lian tak a awm a ni, a ti. In sakna atana steel an hman quality an hman a ṭha lo nge, a design a dik lo tih an chhui chiang ang.

Bangkok-a in sang chim vang hian mi 18 an thi a, hnathawktu 76 chu an chin hriat lohin an la awm mek a ni.

He in sang chim hi kum thum an sa tawh a, a senso pawh hi USD mtd 58 vel nia chhut a ni. Italian-Thai Development Plc leh Chinese firm, China Railway Number 10 Engineer Group Company hnuaia mi Railway Number 10 (Thailand) Ltd te sak a ni a, anni hian share 49% an chang a ni.