Netanyahu-a'n ralthuam tel loin Hamas hruaituten Gaza an chhuahsan phalsak

Israel prime minister Benjamin Netanyahu chuan Palestinian firfiak pawl, Hamas hruaitute chu an ralthuamte tel loin Gaza Strip an chhuahsan a phalsak.

Prime Minister Netanyahu chuan Gaza-a Hamas mi hren mekte chhuah an nih theihna turin Hamas laka beihpui an thlak mek karah inbiakna neih reng a nih thu a sawi bawk.

Pathiannia cabinet meeting an neihah, Israel PM chuan, "Hamas chuan an ralthuamte tung sela, an hruaitute chu Gaza an chhuahsan phalsak an ni ang," tiin Israel-in hma thar a lak lehna mekah Hamas te chu an dinhmun a chhe zel a ni tiin, an mi hrente chhuah an nih ngei theihna tur pawhin an nawr na zel tih a sawi.

Gaza Strip-a inkahhai puan chhunzawm a nih theih loh tak hnuah Israel sipaite chuan Hamas hmunte an bei leh tawh a ni. Hetih lai hian Hamas thlawptu, Yemen helpawl Houthis chuan missile leh drone hmangin Israel an bei zui ve bawk. Pathianni khan Israel sipaite chuan Yemen aṭanga missile kah chhuah chu Israel ram chhung a thlen hmain an lo kap thla niin an tarlang. Houthis chuan Palestinian mite an thlawpna an lantirna a ni tiin, Red Sea leh Gulf of Aden-a lawngte pawh an bei bawk a ni. US chuan global shipping route venghim tur hian hma lain, Yemen-a Houthis hmun a bei ve bawk. Kar liam ta Inrinni zan khan Yemen khawpui, Sanaa hmuna Houthis thunun, military site chu a bei a, mi pakhat a thi a nia sawi a ni.