Malaysia-ah gas pipe a puak

Malayasia khawpui, Kuala Lumpur khaw daiah nimin khan gas pipeline a puak a, kangmei nasa tak a chhuak. A bul hnaia chengte sawn chhuah nghal an ni.

Gas pipeline puahna hi central Selangor state-a Putra Heights-a gas station bulah a ni a, an ram huna zing dar 8:10 a thleng niin national oil company, Petronas chuan a sawi. Kangmei chhuahna bul hnaia gas station pathum chu an him a, mahse venthawn thilah khar an ni. He thil thleng hi chhui chian nghal a nih thu Petronas chuan a tarlang.

Selangor Disaster Management chuan kangmei chhuak hian a bulhnai khua pawh a nghawng tel a, mi eng emaw zat an kang a, damdawi-in lamah enkawl an ni. Thi erawh an awm lo nia sawi a ni. Kangmei chhuakin thil a ti chhiat dan tak hi hriatchian a la ni lo tih a sawi bawk.