Israel PM-in Shin Bet hotu thar tur ruat

Israel prime minister Benjamin Netanyahu chuan an ram security agency, Shin Bet hotu Ronen Bar an ban hnuah a thlaktu atan navy commander hlui, Eli Sharvit a ruat.

Hetih lai hian court-in Ronen Bar ban a nihna hi a la dansak avangin Sharvit hian Shin Bet hotu nihna hi eng hunah nge a chelh dawn tih erawh a la chiang lo.

Prime Minister Netanyahu hi March 21 khan Hamas-ten October 7, 2023-a Israel an beih kaihhawihah Bar hi an ring zo tawh lo tih sawiin, a nihna aṭangin a lo ban tawh a ni. Mahse Bar ban a nih chungchangah hian eptu party leh NGO-te chuan Supreme Court-ah petition an theh luta, court chuan a ban a nihna hi April 8-a appealna ngaihtuahna a nih hma chu a dansak a ni.

Prime Minister Office chuan Shin Bet hotu thar tur atan hian mi pasarihte zirchian leh interview-te neihpui an nih hnuin, vice-admiral Eli Sharvit hi thlan a ni ta tih a sawi. Sharvit hi sipaiah kum 36 chhung ṭangin, navy commander-ah kum nga a lo awm tawh bawk. Hamas, Hezbollah leh Iran laka beihui thlaknaah pawh mi pawimawh leh ṭangkai tak a lo ni tawh niin PMO thuchhuah chuan a tarlang.

Attoney general Gali Baharav-Miara chuan March 21-a Shin Bet hotu ban a nih khan PM Netanyahu hi a thlaktu tur ruat khapsak a ni tih a sawi. Mahse PM hian security agency hotu tur ruat chungchangah sorkar kut a ni tiin a ruat lui ta tho a ni. Heti lai hian kar liam ta khan Bar ban a nih duh loha lantir leh, Gaza Strip-a Israel mi hren mekte chhuah phutin Israel mi tam tak chuan lungawi lohna an lan tir a ni.